Paasissutissat

Isumasioqatigiissitsinerni nereqatigiissitsinernilu saqisoq:
Saqisoq: 232021
Sivisussusaa: Ukioq 1, qaamm. 8-t – ukiut 3-t qaamm. 4-t.
Nikeriarnerit immikkullu ilinniakkat: Isumasioqatigiinnerni nereqatigiissitsinernilu saqisoq, saqisoq.
Piumasaqaatit: 10. klasse imal. tassunga assingusoq + kalaallisut, qallunaatut matematik-kimilu E/02 karaktereqarsimanissaq. Imal. tamakkiisumik isiginnilluni nalilerneqarneq.
Oqaatsit: Qallunaatut
Ilinniarfimmi sungiusaatigalugu ilinniartuusinnaaneq: Periarfissaanngilaq.
Aningaasaqarneq: Ilinniartutut akissarsiat
Inersimasutut ilinniartuusinnaaneq: Periarfissaavoq
Ilinniarfissat: Inuili aamma TechCollege Aalborg.

Saqisoq tassaavoq neriniartarfinni assigiinngitsuni neriniartunik kiffartuussisartoq. Ilinniarfimmi nerisassiat najugassallu pillugit ilinniartinneqassaatit, ilanngullugu qanoq sallaalliutigineqarnissaat pillugit.

Suliassap pingaarnersaanut ilaavoq kiffartuussanik oqaloqateqarsinnaaneq aammalu sallaassissutaasinnaasutut allaqqasut toqqammavigalugit pineqartunut suna nerisinnaaneraat imeruassaatigissaneraallu pillugit innersuussisinnaaneq. Taamaattumik suut sallaalliutigineqarsinnaasut pillugit iggavimmi pissutsinut ilisimaarinnittariaqarnerit pillugit ilinniartinneqassaatit.

Neriffiusussani nerriviliorneq, akiliisitsisarneq aammalu najugassat qanoq akoorneqarsinnaanersut pillugit ilinniartinneqassaatit. Saqisut aamma imerniartarfinni sulisuusinnaapput, tamakkunanilu aaqqissuussinerit angisuut nalliuttorsiornerillu isumagisinnaassallugit.

Saqisussatut ilinniarninni tunngaviatigut iggassineq sallaassiisarnerlu ilinniarfigissavatit.

Periarfissaqarputit isumasioqatigiittunut nerersuaqatigiittunullu saqisunngornissat (trin 1) imaluunniit saqisutut immikkut piginnaaneqarlutit (trin 2) naamassisinnaallutit.

  • Isumasioqatigiinnerni nerersuaqatigiinnernilu saqisoq: Iggassineq ilinniassavat, aamma inniminniisunit saaffigineqartarneq taamatullu nerersuaqatigiinni anginerusuni mikinerusunilu kiffartuussineq.
  • Saqisoq: Iggassineq sukumiinerusumik ilinniassavat aamma nerisitassanik siunnersuisarneq, tamatumali saniatigut oqaatsit (tuluttut franskisullu fagimut tunngasutigut taaguutit) takornarianillu kiffartuussineq ilinniassallugu.

Takuss. 1-mi takuneqarsinnaavoq igasutut ilinniagaq marloqiusanngorlugu aaqqitaasoq, arlaat naamassigukku ilinniarnerit unittikkallarsinnaallugu. Ukioq 1 qaammatillu 8-t ingerlanerani isumasioqatigiinni nerersuaqatigiinnilu saqisussatut naamassisinnaavutit. Ukiut 3-t qaamm. 4-t ingerlanerini saqisutut naamassisinnaallutit.

Ilinniartitaaneq tunngaviatigut pingaarnertullu immikkut ingerlanneqartussanngorlugu aaqqitaavoq, akornatigut suliffinni sungiusaatigalugu sulisarluni. Inuilimi tunngaviatigut ilinniassaatit, sap.ak. 10-t marloriarlugit. Ilinniarnerup pingaarnersaa trin 1 aamma 2-tut assigiinngitsunik sivisussuseqartutut aaqqitaapput, taakkuli TechCollege Aalborg-imi ingerlanneqartarlutik.

Takuss. 1.

Ilinniartitaaneq imatut aaqqitaavoq, isumasioqatigiinnerni nerersuaartunilu saqisunngorsimaguit, taava saqisutut aamma ilinniarnerit nangeqqissinnaassagit.

Tamatuma kingorna aamma igasutut ingerlaqqissinnaavutit.

Ilinniarfimmiittarnerit

Ilinniarfimmiittarnissaq Inuilimi TechCollege Aalborgimilu pisassapput, imatut:

Inuilimi:

  • Tunng. 1: sap.ak. 10-t
  • Tunng. 2: sap.ak. 10-t

TechCollege Aalborgimi:

  • Pingaarneq 1: sap.ak. 8-t + 2, trin 1-i naamassisimagukku
  • Pingaarneq 2: sap.ak. 7-t
  • Pingaarneq 3: sap.ak. 5-t, ”svendeprøveqarnerlu”

Fagit

Ilinniarfimmi ilaatigut makku atuartitsissutigineqassapput:

  • Sallaasiineq
  • Gastronomi
  • Nerisassioriaatsit
  • Saqisutut suliassat nalinginnaat
  • Najugassat
  • Soqutigisaqarfiit attuumassuteqartut
  • Tuniniaaneq kiffartuussinerlu
  • Suliffigissaaneq
  • Psykologi
  • Suliff.aallartisaaneq
  • Tuluttut suliffinni
  • Franskisut suliffinni
  • Bar/barista

Ilinniarfinni oqaatsit

Ilinniarfinni atuakkat danskisuujunerupput, aammalu danskisut atuartinneqarnerusassallutit. Piareersimaffigiuk soraarummeernermi suliasst danskisut saqqummiunneqartussaassammata.

Sungiusaatigalugu sulineq

Sungiusaatigalugu ilinniartuuninni suliassat ilinniakkamut tunngasut misilittaaffigissavatit. Suliffigisassat akuerisaasimassaaq. Ilinniarfinni sungiusaatigalugu sulinissamut periarfissaqartoqanngilaq.

Ilinniarnerit naamassilerukku ”svendeprøveqassaatit”. TechCollege Aalborgimiinnermi kingullermi naggataarutaasumik misilitsittoqassaaq.

Tunngaviatigut ilinniartunngorniaruit, meeqqat atuarfiat naamassinikuusimasariaqarpat. Taamaassimassaaq soraarummeeruteqarlutit naamassisimagukku imaluunniit assingusumik tamatuma kingorna ilinniagaqarsimaguit.

Tunngaviatigut ilinniartunngussaguit piumasaqaatit

10. klassimiit assingusutigulluunniit soraarummeerninni kalaallisut, danskisut matimatikkimilu soraarummeernermi minnerpaamik agguaqatigiissillugu E/02 angunikuusimassavat.

Tamatuma saniatigut sungiusaatigalugu ilinniartuunissamut suliffeqarfimmik isumaqatigiissuteqarsi-maguit, ilinnialernissamut piumasaqaatit naamassisimassavatit.

Pingaarnermi ilinnialersinnaavutit

Pingaarnermi ilinnialernissamut aamma piumasaqaatitaqarpoq. Tassani ilinnialernissamut piumasaqaataavoq tunngaviatigut ilinniarnerup aappaani immikkut projekt-itut suliaq naamassisimassagit, aammalu fagit ukua angusiffigisimassagitit:

  • Danskisut, E-niveau
  • Tuluttut, E-niveau.

Tunngaviatigut ilinniartuuninni – pingaarnerup aallartinnginnerani – periarfissaqassaatit makkunuuna allagartartaarnissamut:

  • Nerisassiornerni eqqiluisaarnissaq
  • Ikiueqqaarneq
  • Ikuallattuulernerni qamiterineq.

Peqataanissamut piumasaqaatit

Matumuna ilinniartuusimanerit iluaqutigalugu pisinnaasaqarfigilersimassavat:

  • Ulapaarfiusuni aamma kiffartuussillaqqissuussaatit
  • Timigissuussuutit
  • Inunnik assigiinngitsunik amerlasuunillu oqaloqatiginnillaqqissuussaatit
  • Allamiut oqaasiinnut piginnaasaqarluartuussuutit
  • Nammineerlutit allallu suleqatigalugit sulisinnaassaatit
  • Pitsaassutsit maluginiagassallu pikkoriffigissavatit
  • Piffissani assigiinngitsuni sulisarnissat piareersimaffigissavat

Saqisutut ilinnialerusukkuit ukioq kaajallugu qinnuteqaateqarsinnaavutit.

Ilinniarnernut atatillugu sungiusaatigalugu suliffissarsisimaguit, najugaqarfinni Majoriamut saaffiginnissaatit. Majoriap ilinniartutut isumaqatigiissusiorninni ikiussavaatit. Taanna illit ilinniarfissarpillu atsiussavarsi, atsiorneqareerpallu Inuilimut nassiunneqassalluni. Tamatuma kingorna atuariartornissamut aggersarneqarumaarputit.

Ukiup ingerlanerani qaqugukkulluunniit ilinniartunngorsinnaavutit.

30-nik ukioqalereersimaguit inersimasutut ilinniartunngorniarsinnaavutit.

Ilinniartitaaneq akeqanngilaq. Ilinniartup sungiusaatigalugu ilinniarfimmilu ilinniartuunermini ilinniartutut akissaateqassaatit. Ilinniartutut akissarsiassat sulisitsisussarpit soqutigisaqaqatigiiffippillu akor-nanni isumaqatigiissutigineqartarpoq.  Ineqarnernut akilitigisartagaqarsimaguit ilinniarfimmiinnerni taassumunnga akiliunneqartarnissat qinnuteqaatigisinnaavat. Ilinniartuunersiuteqarniarlutit qinnute-qaateqaruit, aamma meeqqamut tapisiaqarnissaq qinnuteqaatigisinnaavat. Ilinniarnernut tunngatillugu angalanerit, maleruagassat naapertorlugit akilerneqartassapput.

Ilinniarfimmiinnerni ineqarnermut nerisaqarnermullu akiliuteqartartussaavutit.

Alloriarfik trin 1 isumasioqatigiittarnerni nerersuartitsinernilu saqisuuneq naamassigukku, kingorna trin 2-mik aallartitsisinnaavutit, tamatumuunalu saqisutut naamassillutit.

Inuussutissarsiutitigut ilinniartitaanermi 1. august 2015-i sioqqullugu aallartissimassaguit:
1. august 2015-i sioqqullugu inuussutissarsiornermut ilinniartutut aallartitsisimaguit, ingerlariaqqilluni ilinnialernissamut tigusaanissamut piumasaqaatit allaanerupput.

Cookies

Inuili.gl-ip cookies atorpai

Cookies pisariaqarput nittartagaq iluamik ingerlanissaanut, paasissutissanillu tunisisarluni illit atuisoq qanoq nittartagarput atornerit, taamaalilluta uagut ilinnut allanullu atuisunut nittartagaq pitsaanerusumik atornissaanut aaqqiissinnaassalluta. Inuili.gl-ip cookies-it trafikmåling-mut, login-imut taavalu nittartakkap qupperneranut iluarsaassinermut pingaarnertut atortarpai. Nittartagatsinni ingerlaqqikkuit, cookies-it atorneranut akuerississaatit.