Paasissutissat

Nerisassiornermut ikiorti: 232114
Nerisassiornermut assistenti: 232113
Sivisussusaa: Ukiut 1 ½ – 3.
Periarfissat: Neqaarniatut ikiorti aammalu neqaarniaq
Piumasaqaatit: 10. klasse imal. tassunga assingusoq + kalaallisut, qallunaatut matematik-kimilu E/02 karaktereqarsimanissaq. Imal. tamakkiisumik isiginnilluni nalilerneqarneq
Oqaatsit: Kalaallisut qallunaatullu
Ilinniarfimmi sungiusaatigalugu ilinniartuusinnaaneq: Periarfissaassaaq.
Aningaasaqarneq: Ilinniartutut akissarsiat
Inersimasutut ilinniartuusinnaaneq: Periarfissaavoq
Ilinniarfissaq: Inuili

Nerisassiornermut assistenti nerisassanik peqqinnartunik igaffinni angisuuni suliaqartuusarpoq. Ilinniarfimmi akuutissat pillugit illinnarsakkanillu sallaasiisarneq pillugit ilinniartinneqassaatit.

Suliassap pingaarnersaanut ilaavoq inunnut amerlasuunut igaassap peqqinnartuunissaa siunertaralugu piareersaarsiornissaanut tunngasut. Nerisassiornermi assistentitut nerisassanik pisiniarnissaq aningaasartuutinullu tunngasunik aammalu igaffissuarni suliassat pilersaarusiorneqarnissaanut taamatullu eqqiluitsuunissamut tunngasunik ilinniartinneqassaatit.

Nerisassiornermut assistenti napparsimaviit igaffissuini imaluunniit kantiinani sulisuusinnaapput.

Tunngaviatigut ilinniartinneqassaatit nerisassat piareersarneqarnissaallu pillugit. Suut igaffissuarmi sulinermi atugassaanersut paasisaqarfigissavatit. Inuit ilaat nerisassamik piareersaassapput, allalli nerisassap piffissami sivisunerusumi paarineqarsinnaanera pillugu ilinniartinneqassallutik. Periarfissaqarputit nerisassiornermi ikiortitut (trin 1), aammalu nerisassiortutut (trin 2).

  • Nerisassiornermi ikiorti: Igaffissuarni tunngaviatigut sulineq ilinniassavat.
  • Nerisassiortoq: Nerisassioriaatinik ineriartortitsineq taamatullu iggavinni eqqiluisaarluni ingerlatsineq nakkutigisinnaanngorlugu ilinniassaatit.

Takussutissiaq 1-mi takuneqarsinnavoq nerisassiornermi assistentitut ilinniagaq alloriarfinnut 2-nut immikkoortinneqarsimasoq, periarfissaqassaatit siulleq naamassigukku ilinniarnerit unitsikkallassallugu. Ukioq 1½-ip ingerlanerani nerisassiornermut ikiortitut naamassisinnaavutit, ukiullu pingasut ingerlanerini nerisassiornermut assistentitut naamassisinnaallutit.

Ilinniartitaaneq tunngaviusumik pingaarnertullu ingerlatsivittut avinneqarsimavoq, akornatigut sulinermut misiliisoqartassalluni. Ilinniarnermi ingerlatsineq Inuilimi pisassaaq.

Takuss. 1.

Ilinniartitaaneq imatut aaqqitaavoq, nerisassiornermi ikiortitut naamassiguit taava nerisassiornermi assistentitut ingerlariaqqissinnaassallutit.

Tamatuma kingorna nerisassiorneq peqqissuserlu pillugit batchelor-itut ilinniaqqissinnaallutit.

Ilinniarfimmiittarnerit

Ilinniarfimmi atuarnerit imaapput:

Inuilimi:

  • Tunng. 1: sap.ak.10-t
  • Tunng. 2: sap.ak.10-t
  • Pingaarneq 1: sap.ak.15-t
  • Pingaarneq 2: sap.ak.15-t

Fagi pillugu

Ilinniarfimmi ilaatigut makku ilinniassavatit:

  • Nerisassiassat
  • Peqqinnartunik nerisaqarneq
  • Nerisat eqqiluitsuunerlu.

Inuiaqatigiilerineq, tunisassiorneq pitsaassuserlu pillugit sammisaqartassaatit.

Ilinniarfimmi oqaatsit

Ilinniarnermi atuagassat danskisoortuunerupput, kalaallisut danskisullu atuartinneqartassaatit, soraarummeernermilu oqaatsit atorniakkatit nammineq toqqarsinnaallugit.

Sungiusaatigalugu ilinniarneq

Sungiusaatigalugu ilinniarninni fagimi ilinniakkanni suleriaatsit pillugit ilinniartinneqassaatit. Suliffeqarfik sungiusarfigisat akuerisaasimassaaq, nassaarsinnaanngikkuillu Inuilimi sungiusaatigalugu sulisinnaallutit. Ilinniagarpit naamassisimanissaanut soraarummiissaatit (svendeprøve).

Tunngaviatigut ilinniartunngorniaruit, meeqqat atuarfiat naamassinikuusimasariaqarpat. Taamaassimassaaq soraarummeeruteqarlutit naamassisimagukku imaluunniit assingusumik tamatuma kingorna ilinniagaqarsimaguit.

Tunngaviatigut ilinniartunngussaguit piumasaqaatit

10. klassimiit assingusutigulluunniit soraarummeerninni kalaallisut, danskisut matimatikkimilu soraarummeernermi minnerpaamik agguaqatigiissillugu E/02 angunikuusimassavat.

Tamatuma saniatigut sungiusaatigalugu ilinniartuunissamut suliffeqarfimmik isumaqatigiissuteqarsi-maguit, ilinnialernissamut piumasaqaatit naamassisimassavatit.

Pingaarnermi ilinnialersinnaavutit

Pingaarnermi ilinnialernissamut aamma piumasaqaatitaqarpoq. Tassani ilinnialernissamut piumasa-qaataavoq tunngaviatigut ilinniarnermi aappaani misileraalluni suliaqarnermi angusisimassaatit, aammalu

Tunngaviatigut ilinniartuuninni – pingaarnerup aallartinnginnerani – periarfissaqassaatit makkunuuna allagartartaarnissamut:

  • Nalinginnaasumik nerisassiornermi eqqiluisaarneq
  • Ikiueqqaarneq
  • Ikuallattuulernermi qamiterineq.

Peqataanissamut piumasaqaatit

Matumuna ilinniartuussaguit pingaaruteqarpoq:

  • Timit nukittuujussaaq, nikorfangaatsiartarlutillu pisungaatsiartassagavit
  • Peqqinnartunik nerisaqarluarnissaq soqutigisarissavat
  • Iggavimmi sulineq soqutigisarissavat
  • Aamma ulapaarfiusuni aaqqissuussillaqqittuussaatit
  • Eqqiluisaarneq soqutigisarissavat
  • Nammineerlutit allallu suleqatigalugit sulisinnaassaatit
  • Unnukkut sap.ak. naanerini sulisinnaasassaatit
  • Qarasaasiatigut atortorissaarutit atorlugit sulisinnaassaatit

Nerisassiornermi ikiortissatut ilinnialerniaruit ukioq kaajallugu qinnuteqaateqarsinnaavutit.

Ilinniarnernut atatillugu sungiusaatigalugu suliffissarsisimaguit, najugaqarfinni Majoriamut saaffiginnissaatit. Majoriap ilinniartutut isumaqatigiissusiorninni ikiussavaatit. Taanna illit ilinniarfissarpillu atsiussavarsi, atsiorneqareerpallu Inuilimut nassiunneqassalluni. Tamatuma kingorna atuariartornissamut aggersarneqarumaarputit.

Ukiup ingerlanerani qaqugukkulluunniit ilinniartunngorsinnaavutit.

30-nik ukioqalereersimaguit inersimasutut ilinniartunngorniarsinnaavutit.

Ilinniarninni sungiusaatigalugu suliffissarsisinnaanngikkuit, Inuilimi tamatuma ingerlassinnaanissaanut periarfissaqarputit. Taamaasiorniaruit aamma Majoriaq aqqutigalugu qinnuteqaateqarsinnaavutit.

Ilinniartitaaneq akeqanngilaq. Ilinniartup sungiusaatigalugu ilinniarfimmilu ilinniartuunermini ilinniartutut akissaateqassaaq. Ilinniartutut akissarsiassat sulisitsisussarpit soqutigisaqaqatigiiffippillu akor-nanni isumaqatigiissutigineqartarpoq. Ilinniartuunersiuteqarniarlutit qinnuteqaateqaruit, aamma meeqqamut tapisiaqarnissaq qinnuteqaatigisinnaavat. Ilinniarnernut tunngatillugu angalanerit, maleruagassat naapertorlugit akilerneqartassapput.

Ilinniarfimmiinnerni ineqarnermut nerisaqarnermullu akiliuteqartartussaavutit.

Alloriarnissani unikkallarnissat qinersimagukku, kingorna ilinniarnernut uteqqissinnaavutit taavalu ilinniarnerit nangeqqillugu.

Nerisassiornermi assistentitut soorlu napparsimaviit igaffissuini kantiinaniluunniit suliffissarsisinnaavutit.

Inuussutissarsiutitigut ilinniartitaanermi 1. august 2015-i sioqqullugu aallartissimassaguit:
1. august 2015-i sioqqullugu inuussutissarsiornermut ilinniartutut aallartitsisimaguit, ingerlariaqqilluni ilinnialernissamut tigusaanissamut piumasaqaatit allaanerupput.

Cookies

Inuili.gl-ip cookies atorpai

Cookies pisariaqarput nittartagaq iluamik ingerlanissaanut, paasissutissanillu tunisisarluni illit atuisoq qanoq nittartagarput atornerit, taamaalilluta uagut ilinnut allanullu atuisunut nittartagaq pitsaanerusumik atornissaanut aaqqiissinnaassalluta. Inuili.gl-ip cookies-it trafikmåling-mut, login-imut taavalu nittartakkap qupperneranut iluarsaassinermut pingaarnertut atortarpai. Nittartagatsinni ingerlaqqikkuit, cookies-it atorneranut akuerississaatit.